உறுப்பு மாற்று அறுவை சிகிச்சை சில அடிப்படை தகவல்கள், அறுவை சிகிச்சை வரலாறு (பாகம்-4); History of Surgery (Part-4), History of Organ Transplantation

அனைவருக்கும் வணக்கம், (கடந்த பதிவுகளில் பொது அறுவை சிகிச்சையின் வரலாறுகளை பற்றி விரிவாக அலசினோம் அல்லவா?, அந்த வகையில் இன்று உறுப்பு மாற்று அறுவை சிகிச்சை (Organ Transplantation) பற்றி கொஞ்சம் அறிந்துகொள்வோம் வாருங்கள், அறுவை சிகிச்சை வரலாறின் முந்தைய பாகங்களை வாசிக்க தவறவிட்டவர்கள் நேரமிருப்பின் இங்கு சென்று வாசித்து விட்டு இப்பதிவை தொடர வேண்டுகிறேன்) பொதுவாக உறுப்பு மாற்று அறுவை சிகிச்சைக்கும், சாதாரண அறுவை சிகிச்சைக்கும் நிறைய வித்தியாசம் உண்டு. உதாரணத்திற்கு ஒரு சைக்கிள் ட்யூப்பை (Cycle Tube) எடுத்துக்கொள்வோம். ட்யூப் பஞ்சர் (Puncher) ஆனால் அதனை ஒட்டி சரி செய்வது சாதாரண அறுவை சிகிச்சை என்று எடுத்துக்கொண்டால் அதே பஞ்சர் ஒட்டி சரி செய்ய இயலாத அளவிற்கு பெரிதாய் போய்விடும் போது அந்த ட்யூப்பையே கழட்டி தூர எறிந்துவிட்டு புதிதாக ட்யூப் மாற்றிக் கொள்ளுதல் உறுப்பு மாற்று அறுவை சிகிச்சை என்று எடுத்துக்கொள்ளலாம்.

அனால் சைக்கிள் ட்யூப்பை மாற்றுவது போல் மனித உடலில் பழுதுபட்ட உடல் உள் உறுப்புகளை மாற்றுவது என்பது அத்தனை சுலபமான காரியமில்லை. அறுவை சிகிச்சை நடைமுறையிலுள்ள தொழில்நுட்ப குறைபாடுகள் அனைத்தும் களையப்பட்டு மேம்படுத்தப்பட்டு விட்டாலும் கூட உடலுக்குள் புதிதாக புகுத்தும் அந்த உறுப்பை நம் உடல் ஏற்றுக்கொள்வது முக்கியம் அல்லாவா?. ‘சக்கரமே திறந்திடு’ என்று அலிபாபா கதையில் வரும் காசிம் பாய் (Cassim, greedy brother of Ali Baba) போல் கண்ணீர் விட்டு அழுதால் கூட நம் உடல், புதிதாக உடலுக்குள் புகுத்தும் எந்த உறுப்பையும் ஏற்றுக்கொள்ளாது, நிராகரித்துவிடும். பின் எப்படி உறுப்புகளை இணைத்து அறுவை சிகிச்சை செய்கிறார்கள் என்கிறீர்களா வாருங்களேன் அது பற்றி மேலும் தெரிந்துகொள்வோம்.!

அதைப்பற்றி தெரிந்துகொள்வதற்கு முன்பு முதலில் நம் உடலில் உள்ள எந்தெந்த உருப்புக்களையெல்லாம் தானம் செய்யமுடியும் என்று தெரிந்துகொள்வது இன்றியமையாதது. அறுபது வயதிற்குட்பட்ட அனைவரும் தாமாக முன்வந்து உடல் உறுப்புகளை தானம் செய்யலாம் என்றாலும் அதற்கென்று சில சட்ட திட்டங்கள் 1900-களில் இருந்தே உலகமெங்கும் நடைமுறையில் உள்ளது. இந்திய அரசியலமைப்பில் 1954-ஆம் ஆண்டு இயற்றப்பட்ட சட்டத்தின் படி 18 வயது நிரம்பிய ஆண் மற்றும் பெண் இருபாலரும் தாமாக முன்வந்து உடல் உறுப்புகளை தானம் செய்ய வழிவகை செய்யப்பட்டது, பிற்காலத்தில் நல்ல காரியங்களுக்கு வயது ஒரு தடையாக இருக்கக்கூடாது என்ற கோரிக்கை எழுந்தவுடன் 1994 ஆம் ஆண்டு அதே சட்டத்தில் சின்ன திருத்தம் கொண்டு வரப்பட்டு 18 வயதிற்கு உட்பட்டவரும் பெற்றோர் அல்லது காப்பாளரின் அனுமதியுடன் தங்கள் உறுப்புக்களை தானம் செய்யலாம் என்று அனுமதியளிக்கப்பட்டது.

அந்த வகையில், ஒருவர் தன் உடலிலுள்ள 25 வகையான உறுப்புக்களையும், திசுக்களையும் தானம் செய்ய முடியும் என்றாலும் ஒருவர் உயிரோடு இருக்கும் போது (Living donor) ஒரே ஒரு சிறுநீரகம் (Kidney), ஈரலின் ஒரு பகுதி (Liver), நுரையீரலின் ஒரு பகுதி (Lungs), குடலின் ஒரு பகுதி (Intestine) ஆகிய உறுப்புகளை மட்டுமே தானம் செய்ய முடியும். ஒருவர் இறந்த பின் (deceased or cadaveric donor) எலும்பு (Bone), எலும்பு மஜ்ஜை (Bone Marrow), ரத்த நாளங்கள் (Blood Vessels), இதயத்திலுள்ள வால்வுகள் (Heart Valves), தோல் (Skin), இரெண்டு சிறுநீரகங்கள் (Two Kidneys), கணையம் (Pancreas), குடல் முழுவதும், கண் விழித்திரை (Cornea) ஆகிய உறுப்புகளை தானமாக தரலாம்.

நம் உடலில் உள்ள இதயத்தை மட்டும் உயிரோடு இருக்கும் போதும் சரி இறந்த பின்னாலும் சரி, எடுத்து இன்னொருவருக்கு பயன்படுத்த முடியாது. ‘ப்ரெய்ன் டெத் (Brain Death)’ எனப்படும் மூளையின் மரணம் அதாவது மூளை செயல் இழந்து உடலில் உயிர் ஊசலாடிக்கொண்டிருக்கும் போது நோயாளிகளிடமிருந்து பிரித்தெடுத்து மட்டுமே பயன்படுத்த முடியும். மூளை செயல் இழந்த பிறகு பிரித்தெடுக்கப்படும் இதயம் மட்டுமல்ல உடலின் மேலும் சில முக்கிய உறுப்புகளான கல்லீரல், நுரையீரல் ஆகியவற்றையும் கூட இன்னொருவருக்கு பயன்படுத்த முடியாது. ஒருவரின் மூச்சு நின்ற முதல் ஐந்து நிமிடங்களில் மூளையில் உள்ள 25% செல்கள் செயல் இழந்து விடுகின்றன. பத்தாவது நிமிடத்தில் அது 50% சதவீதமாகவும் 15 நிமிடத்தில் அது 100% சதவீதமாகவும் உயர்ந்து நோயாளியை மெல்ல மெல்ல மரணத்திற்கு கொண்டு போய்விடுகிறது, இதன் காரணமாகத்தான் சுவாசம் நின்ற 15 நிமிடத்திற்கு பிறகு ஒருவரை பிழைக்க வைக்க முடியாமல் போகிறது.

சரி., இப்போது உடல் உறுப்புகளை தானம் செய்பவரின் உடம்பிலிருந்து எப்படி பிரித்தெடுக்கிறார்கள் என்று பார்ப்போமா.? உடம்பிலிருந்து ஒரு உறுப்பை பிரித்து எடுப்பதற்கு முன்னால் அந்த உறுப்பு உலர்ந்து போகாமல் இருக்க குளிர்விக்க பயன்படுத்தும் சில ரசாயனக் கலவைகளை பிரித்து எடுக்கப்பட வேண்டிய அந்த உறுப்புக்குள் செலுத்துவார்கள். சில நேரங்களில் கலப்படம் இல்லாத சுத்தமான ஐஸ் கட்டிகளை கூட அந்த உறுப்புக்குள் செலுத்துகிறார்கள். எடுக்கப்பட்ட உறுப்பு உடனடியாக நன்றாக ஸ்டெரிலைஸ் (Sterilize) செய்யப்பட்டு ஜாடியிலோ, குடுவையிலோ அல்லது ஐஸ் பெட்டிகளிலோ வைத்துவிடுவார்கள்.

பிரித்தெடுக்கப்படும் எல்லா உருப்புகளுமே குறிப்பிட்ட நேரத்திற்கு பிறகு தன் உயிர்ப்புத்தன்மையை இழந்து விறைத்துப் போக நேரிடும் இதை தடுக்க டாக்டர்கள் அந்த உறுப்புகளை வியாஸ்பான் (Viaspan), யூரோ கோலின்னஸ் (Euro-Collins), கஸ்டோர்சல் (Costorsol) ஆகிய ரசாயன கலவைகளுக்குள் வைத்து பதப்படுத்துகிறார்கள். அப்படியே பதப்படுத்தி வைத்தாலும் கூட அவற்றிற்கும் ஒரு கால அளவு உண்டு அந்த வகையில் சிறுநீரகத்தை 72 மணிநேரம் வரையிலும், கல்லீரலை 18 மணி நேரமும் வரையிலும், இதயத்தை 5 மணிநேரம் வரையிலும், நுரையீரலை 4 மணிநேரம் வரையிலும் கணையத்தை 20 மணிநேரம் வரையிலும் பதப்படுத்தி வைத்திருந்து உபயோகிக்கலாம். அதே போல் கார்னியா எனப்படும் கண் விழித்திரையை 10 நாட்கள் வரையிலும், தோல், எலும்பு, இதயத்தின் வால்வுகள் போன்றவை 5 வருடகாலம் வரையிலும் பதப்படுத்தி வைத்து உபயோகிக்கலாம்.

உடல் உறுப்புகளை தானமாக கொடுப்பவர்கள் யாராக இருந்தாலும் சரி அதாவது ஆணாக இருந்தாலும் சரி பெண்ணாக இருந்தாலும் சரி நல்ல உடல் நலத்தோடு இருத்தல் அவசியம். பைபாஸ் சர்ஜரி செய்துகொண்டவர்கள், இதயம் சம்பந்தப்பட்ட நோய்களுக்கு சிகிச்சை எடுத்துக்கொண்டவர்கள், புற்று நோயால் பாதிக்கப்பட்டவர்கள், காமாலை மற்றும் பால்வினை நோயால் பாதிக்கப்பட்டவர்கள் மற்றும் பிளட் பிரஷர், சுகர் இருப்பவர்கள் ஆகிய அனைவரும் உடல் உறுப்புகளை தானம் செய்ய தகுதியற்றவர்களாக கருதப்படுகிறார்கள் (அப்போ நாட்டில ரொம்ப பேருக்கு உடல் உறுப்புகளை தானம் செய்யும் தகுதியிருக்காது போலிருக்கே ம்ம்ம்.?)

உயிருடன் இருக்கும் போது உடல் உறுப்பை தானம் செய்வதால், தானம் செய்தவருக்கு ஏதாவது ஆபத்து ஏற்படுமா, என்கின்ற சந்தேகம் படித்தவர் படிக்காதவர் என்ற பாகுபாடின்றி எல்லோருக்கும் இருக்கவே செய்கிறது. பொதுவாக உடல் உறுப்புகளை தானம் செய்கிறவர்களுக்கு எந்த காலத்திலும் எந்தவித பாதிப்பும் ஏற்படுவதில்லை. இரண்டு சிறுநீரகங்கள் உள்ளவர்கள் ஒன்றை தானமாக கொடுக்கும் போது இரண்டு உறுப்பு செய்ய வேண்டிய வேலையை, ஒரு உறுப்பு செய்வதால் நாளடைவில் அதனுடைய அளவு சற்று பெரிதாகும், அவ்வளவுதான் வேறு எந்த பின்விளைவுகளும் ஏற்படுவதில்லை. நுரையீரலின் ஒரு பகுதியை மட்டும் கொடுப்பதால் மீதமுள்ள ஒரு நுரையீரலின் பகுதி சீராக வேலை செய்யும், கல்லீரலின் ஒரு பகுதியை தானம் செய்தவர்களுக்கு அடுத்த சில மாதங்களுள் கல்லீரல் தானாகவே வளர்ந்துவிடும். ஆகையால் உடல் உறுப்புகளை தானம் செய்தவர்களும் சாதாரண ஆட்களை போலவே இயல்பாக இருக்கலாம்.

இவ்வளவு பிரச்சனைகளையும் சோதனைகளையும் தாண்டி உடலுக்குல் ஒரு உறுப்பை பொருத்தினோம் என்றால் நம் உடல் சிம்பிளாக ‘No I will not accept’ என்று பெரிதாய் தலையை ஆட்டி மறுக்கவே செய்தது. கிட்டத்தட்ட ஆயிரம் ஆண்டுகளுக்கும் மேலாக, மருத்துவ மாமேதைகளின் கனவாக இருந்த  இந்த உறுப்பு மாற்று அறுவை சிகிச்சையில் ஏற்பட்ட தோல்வியை மருத்துவர்களால் அத்தனை சுலபமாக எடுத்துக்கொள்ள இயலவில்லை, தொடர்ச்சியான ஆய்வுகளுக்கு பிறகு ரத்தத்தில் உள்ள நோய் எதிர்ப்பு புரதமான ஆண்டிபாடீஸ் தான் (Antibody known as immunoglobulin), உடல் பாதுகாப்பு கருதி அந்த உறுப்புக்களை ஏற்றுக்கொள்ளாமல் நிராகரிக்கிறது என்பதை கண்டறிந்தனர். சோர்ந்து போய்விடாத நம் மருத்துவர்கள் ‘பிளாஸ்மா பெரிஸிஸ் (Plasmapheresis)’ என்கின்ற, ரத்த புரதங்களை தனித்தனியாக பிரிக்கும், சிகிச்சை முறையை பயன்படுத்தி ரத்தத்தில் உள்ள ஆன்டிபாடிகளை மட்டும் ரத்தத்தில் இருந்து பிரித்து அகற்றிவிட்டு., தானமாக பெற்ற அந்த உறுப்பை உடலில் பொறுத்த.., ஒரு வழியாக உடல் ‘ஜெ’ போட்டு ஒத்துக்கொள்ள ஆரம்பித்ததோடு அந்த உறுப்புக்கு உண்டான இயல்பான பணியையும் தொடர்ந்து செய்ய வழிகளை ஏற்படுத்தியது, தொடர்ந்து பிரச்சனைகள் ஏற்படுவதை தடுக்கும் பொருட்டு உறுப்பு மாற்று அறுவை சிகிச்சையின் போது உடலில் இந்த ஆன்டிபாடிகளை உற்பத்தி செய்வதில் முக்கிய உறுப்பாக திகழும் மண்ணீரலையும் (Spleen) எடுத்துவிட்டே பொருத்துகிறார்கள் இதனால் தானம் பெறப்பட்டு பொருத்தப்படும் உறுப்புகள் ஒரு போதும் நிராகரிக்கப்படுவதில்லை.

உறுப்பு மாற்று அறுவை சிகிச்சையின் வரலாறும் கூட நம் இந்திய மருத்துவ மாமேதையான சுஸ்ருதாவிலிருந்தே ஆரம்பிக்கிறது, மருத்துவ கூற்று படி, தோல் இடமாற்று அறுவை சிகிச்சை கூட உறுப்பு மாற்று அறுவை சிகிச்சை என்றே கருதப்படுகிறது அந்த வகையில் சுஸ்ருதா அறிமுகபடுத்திய உடலின் ஏதாவது ஒரு பகுதியிலிருந்து சதையை அறுத்தெடுத்து கிழிந்த மூக்குகளை சரிசெய்யும் ரினோபிளாஸ்டி (Rhinoplasty) எனப்படும் மூக்கை செப்பனிடும் அறுவை சிகிச்சையும் உறுப்பு மாற்று அறுவை சிகிச்சையாகவே கருதப்படுகிறது. இதைதவிர்த்து மருத்துவ விஞ்ஞானம் சமர்ப்பித்த ஆதாரங்களின் படி, உடல் உள் உறுப்பு மாற்று அறுவை சிகிச்சை என்று பார்த்தோமானால் 1902 ஆம் ஆண்டு அலெக்ஸில் கர்ல் (Alexis Carrel, 1873 – 1944) என்ற பிரான்ஸை சேர்ந்த மருத்துவர் தான் உலகில் முதன் முதலாக இன்னொரு மனிதனிடமிருந்து தானமாக பெற்ற ரத்தக் குழாய்களை (Blood Vessels) அறுவை சிகிச்சை மூலம் வெற்றிகரமாக இன்னொரு நோயாளியின் உடலில் இணைத்து பொருத்தியவர் ஆவார். அத்தோடு உடல் உறுப்பு மாற்று அறுவை சிகிச்சைக்கும் புதிய கதவையும் திறந்து வைத்தவர் ஆவர்.!

தொடர்ந்து மூன்று வருடம் கழித்து 1905 ஆம் ஆண்டு டாக்டர் எட்வர்ட் ஸிம் (Eduard Zirm, 1863 – 1944) என்ற ஆஸ்திரியா நாட்டை சேர்ந்த மருத்துவர் உலகில் முதன் முதலாக கார்னியா கண் அறுவை சிகிச்சையை வெற்றிகரமாக செய்துகாட்டினார். அதன் பிறகு 50 ஆண்டுகள் கழித்து 1954 ஆண்டு அமெரிக்காவின் பாஸ்டன் நகரில் டாக்டர் ஜோசப் முர்ரே (Josseph Murray, 1919 – active) மற்றும் ஜான் ஹாரிஸ்சன் (John Harrison, 1909 – 1984) என்ற இரு அமரிக்க மருத்துவர்கள் இணைந்து உலகின் முதல் சிறுநீரக மாற்று அறுவை சிகிச்சையை வெற்றிகரமாக செய்து காட்டினர். அதன் பிறகு 1967 ல் அமெரிக்காவில் உள்ள டென்வர் என்ற இடத்தில் முதன் முதலாய் கல்லீரல் மாற்று அறுவை சிகிச்சை வெற்றிகரமாக செய்யப்பட்டது. தொடர்ந்து 1965 ஆம் ஆண்டு முதல் இறந்தவர்களின் உடல் உறுப்புகளையும் மாற்று அறுவை சிகிச்சைக்காக பயன்படுத்த ஆரம்பித்தார்கள். பிறகு இரெண்டு வருடம் கழித்து 1967 ஆம் ஆண்டு டாக்டர் கிறிஸ்டியன் பெர்னார்ட் (Christiaan Barnard, 1922 – 2001) என்ற தென் ஆப்ரிக்காவை சேர்ந்த மருத்துவர்., மருத்துவ உலகத்தில் ஒரு அதிசயத்தை நிகழ்த்திக்காட்டினார். அது உலகின் முதல் வெற்றிகரமான இதய மாற்று அறுவை சிகிச்சை ஆகும். தொடர்ந்து மருத்துவ துறையில் ஏற்பட்ட அசாதாரண வளர்ச்சி உறுப்பு மாற்று அறுவை சிகிச்சையின் பரிணாம வளர்சிக்கு வித்திட்டது.

இன்றைய நவநாகரீக உலகத்தில்., மருத்துவத்துறை எத்தனையோ அபிரிமிதமான வளர்ச்சியடைந்திருந்தாலும் கூட பொது மருத்துவமாகவே இருக்கட்டும், அறுவை சிகிச்சை மருத்துவமாகவே இருக்கட்டும் அது ஆரம்பித்த இடம் எனது இந்திய மருத்துவரான சுஸ்ருதாவிடம் இருந்துதான் என்பதை நினைத்து பார்க்கும் போது என் ரத்தநாளங்களில் ஆணவ ரத்தம் தறிகெட்டு பாய்வதை உணர இயலுகிறது. இந்த தொடர் பதிவின் மூலம் சில நல்ல விசயங்களை உங்களிடம் பகிர்ந்துகொண்ட மனநிறைவுடன் இத்தொடர் பதிவை நிறைவு செய்கிறேன், விரைவில் மற்றுமொறு பயனுள்ள பதிவின் வாயிலாக உங்களை சந்திக்கிறேன், நன்றி.., வணக்கம்.!

	Tweet

பதிவுகளை தவறவிடாமல் வாசிக்க உங்கள் மின்னஞ்சல் முகவரியை கீழே உள்ளிட்டு பதிவு செய்து கொள்ளுங்கள்