ரெண்டாவது உயிர்க்கோளம் ஐ மீன் இரண்டாவது பூமி (புவி); Biosphere 2 by Varalatru Suvadugal

அனைவருக்கும் வணக்கம், (நாம் வாழும் இந்த பூமியைப் பற்றி நாம்தெரிந்து வைத்திருக்க வேண்டிய சில அடிப்படை தகவல்களை உள்ளடக்கிய எனது முந்தைய பதிவை வாசிக்க தவறியவர்கள் நேரமிருப்பின் இங்கு சென்று தவறாமல் வாசிக்குமாறு தங்களை அன்புடன் வேண்டுகிறேன்) அளவுக்கு அதிகமாக வெளியேற்றப்படும் புகை, அளவுக்கு அதிகமாக வெளியேற்றப்படும் கழிவுகள் மற்றும் அளவுக்கு அதிகமான ரசாயனங்களின் பயன்பாடுகள் ஆகியவற்றால் இன்று நாம் நமது சுற்றுப்புறத்தை நம்மால் இயன்ற அளவு மாசுபடுத்தி வைத்திருக்கிறோம்! அதன் விளைவுகளை கண்கூடாக பார்த்தபிறகு மீண்டும் பழையதுபோலவே மாசுபடுத்தப்படாத பூமி கிடைக்காதா என்று ஏங்குகிறோம்! அப்படிப்பட்ட மாசுபடுத்தப்படாத பூமி ஒன்று உண்மையில் இருக்கிறது என்றால் உங்களால் நம்ப முடிகிறதா நண்பர்களே? சத்தியமாக பொய்யில்லை உண்மைதான், அதுதான் இண்டாவது உயிர்க்கோளம் (Biosphere 2) என்று அழைக்கப்படும் இரண்டாவது பூமி! 

இரண்டாவது உயிர்க்கோளத்தை பற்றி தெரிந்துகொள்வதற்கு முன்பு முதலில் சுற்றுப்புற சூழல் மாசுபடுதல் என்றால் என்ன என்பது பற்றி சுருக்கமாக தெரிந்துகொள்வோம் வாருங்கள்! நம்மை சூழ்ந்திருக்கும் காற்று நாம் சுவாசிக்க இயலாத அளவிற்கு அசுத்தமாக மாறுவது மற்றும் நாம் குடிக்கும் குடிநீர், உண்ணும் உணவுப்பொருட்கள் உட்கொள்ள இயலாத அளவிற்கு நஞ்சாக மாருவதைத்தான் சுற்றுப்புறசூழல் மாசுபடுவது என்கிறோம்! நாம் எந்த அளவிற்கு நமது சுற்றுப்புறச் சூழலை மாசுபடுத்தி வைத்திருக்கிறோம் என்பதற்கு உதாரணமாக ஒரு சிறிய விஷயத்தை கூறுகிறேன், கேளுங்கள்.!

நான்கில் மூன்று பாகம் நீரால் சூழப்பட்ட இப்புவியில் உள்ள மொத்த நீரில் 97% சதவீதம் கடல் நீர் தான் (Seawater) அதாவது நாம் நேரடியாக குடிக்க இயலாத உப்பு நீர் (Saline Water)! மீதமுள்ள 3% சதவீத தண்ணீர் தான் நாம் நேரடியாக குடிக்க உகந்த நன்னீர் ஆகும்! இந்த 3% சதவீதத்தில் ஆறுகள், ஏரிகள், குளம், குட்டை, நிலத்தடி நீர் ஆகிய அனைத்து நன்னீர் ஆதாரங்களும் அடங்கும்! இவற்றில் நிலத்தடி நீர் தான் உலக மக்களின் தண்ணீர் தேவையை பூர்த்தி செய்வதில் முக்கியபங்கு வகிக்கிறது என்றால் மிகையில்லை! தோராயமாக 30% சதவீத அளவிற்கு உலக மக்களின் தண்ணீர் தேவையை பூர்த்தி செய்கிறது நிலத்தடிநீர் (Ground Water).! அந்த நிலத்தடி நீரின் தற்போதைய நிலை என்ன தெரியுமா நண்பர்களே? உலகெங்கும் 60% இடங்களிலுள்ள நிலத்தடிநீர் குடிப்பதற்கு ஏற்றதாக இல்லை என்பதுதான்! என்ன நண்பர்களே அதிர்ச்சியாக இருக்கிறதா? இது பற்றி மேலும் தெரிந்துகொள்வோம், வாருங்கள்.!

கடந்த 2010 ஆண்டில் உலகெங்கும் உள்ள நிலத்தடி நீர் குடிப்பதற்கு ஏற்றதாக இருக்கிறதா என்று பெரிய அளவில் சோதனை மேற்க்கொள்ளப்பட்டது! சோதனையின் முடிவில் உலகெங்கும் 60% சதவீத இடங்களிலுள்ள நிலத்தடி நீரில் ஃபுளோரைடு (Fluoride), கால்சியம் குளோரைடு (Calcium Chloride) மற்றும் சல்பேட் (Sulfate) போன்ற நச்சுப்பொருட்கள் கலந்திருப்பது கண்டுபிடிக்கப்பட்டது! இந்த நச்சுப்பொருட்கள் கலந்துள்ள நீரை பருகுவதால் மனிதர்களுக்கு கேன்சர் உள்ளிட்ட எண்ணற்ற கொடிய ஏற்படுவதாகவும் கண்டுபிடிக்கப்பட்டது! பெருகிவரும் ரசாயன கழிவுகளால் வெறும் 25 ஆண்டுகளில்தான் நிலத்தடிநீர் இந்த அளவு மோசமாக மாசடைந்திருப்பதாக தெரிவிக்கிறது அந்த ஆய்வின் அறிக்கைகள்! இதனை பல்வேறு நாடுகளை சேர்ந்த நீர்வளத்துறையின் (Department of Water Resource) தனிப்பட்ட அறிக்கைகளும் உறுதிப்படுத்துகின்றன!

உலகெங்கும் உள்ள நிலத்தடி நீரின் மீது ஆய்வு மேற்கொள்ளப்பட்டது என்று மேலே சொன்னேன் அல்லவா, அப்போது சென்னையில் நிலத்தடிநீரின் தூய்மையை பரிசோதிப்பதற்காக சென்னையை சுற்றிலும் 30-க்கும் மேற்பட்ட இடங்களிலிருந்து நிலத்தடி நீர் பெறப்பட்டு அவை சோதனைக்கு உட்படுத்தப்பட்டது! சோதனையின் முடிவில் இரண்டே இரண்டு இடங்களில் இருந்து பெறப்பட்ட நிலத்தடிநீர் மட்டுமே குடிப்பதற்கு ஏற்றதாக இருப்பதாக கண்டறியப்பட்டது! எஞ்சிய இடங்களிலிருந்து பெறப்பட்ட நீரில் ஃபுளோரைடு கலந்திருந்தது உறுதிசெய்யப்பட்டது! இரண்டு வருடங்களுக்கு முன்பே சென்னை நிலத்தடி நீரின் நிலை இந்த அளவு மோசமாக இருந்திருந்தால், இப்போது எப்படி இருக்ககூடும் என்று நினைத்து பார்க்கவே அச்சமாக இருக்கிறதல்லவா? இந்த அளவிற்குத்தான் சுற்றுப்புற சூழலை மாசுபடுத்திக் கொண்டிருப்பதை நோக்கிய நமது பயணம் சென்றுகொண்டிருகிறது! இது ஒரு சின்ன உதாரணம் தான் உங்களை மிரட்ட இதைப்போல இன்னும் பல விசயங்கள் இருக்கிறது.!

சரி இப்போ பதிவோட தலைப்புக்கு போவோம்! உயிரினங்கள் வாழ்வதால் தான் பூமி ஒரு உயிர்க்கோள் என்று அழைக்கப்படுகிறது! புவியில் உயிரினங்கள் தோன்றியதற்கு பல்வேறு காரணிகள் உறுதுணையாக இருந்தாலும் மிகமுக்கிய காரணமாக கூறப்படுவது புவியின் நீர்க்கோளம், நிலக்கோளம் மற்றும் வளிமண்டலம் ஆகியவையே ஆகும்! இவற்றில் நிலவிய சாதகமான சூழ்நிலைகளின் விளைவாகவே புவியில் தாவரங்கள், உட்பட நுண்ணியிரிகள், விலங்குகள் மற்றும் மனிதன் ஆகிய அனைத்து உயிரினங்களும் தோன்றியது!

இப்படி தோன்றிய உயிரினங்கள் எவ்வித பாதிப்பும் இன்றி புவியில் தொடர்ந்து வாழ சுற்றுசூழல் அதாவது சூழ்நிலைமண்டலம் (Ecosystem) பாதிப்படையாமல் இருப்பது மிகவும் அவசியம்! தாவரங்கள், நுண்ணியிர்கள், நீந்துவன, ஊர்வன, பறப்பன, விலங்குகள் ஆகிய அனைத்தும் சேர்ந்த தொகுப்பைத்தான் சூழ்நிலைமண்டலம் என்று அழைக்கிறார்கள்! உயிருள்ள இந்த சூழ்நிலைமண்டலமும், உயிரற்ற இயற்கை சூழலும் (நீர், நிலம், காற்று) சேர்ந்துதான் புவியில் மனித இனம் தோன்றுவதற்கு வித்திட்டது! மனித இனம் உருவாகி பரவியதில் சூழ்நிலைமண்டலத்திற்கும் இயற்கை சூழலுக்கும் இடையேயுள்ள தொடர்பைபற்றி ஆய்வு செய்யும் துறையைத்தான் சூழியல் (Ecology) என்று அழைக்கிறோம்! சூழ்நிலைமண்டலம் மற்றும் இயற்கை சூழல் ஆகிய அனைத்தும் இணைந்த ஓட்டு மொத்த தொகுப்பையே உயிர்கோளம் (Biosphere) என்று அழைக்கிறார்கள்!.

நமக்கு தெரிந்து பரந்து விரிந்த இந்த பேரண்டத்தில் பூமியிலிருந்து தோராயமாக 14 பில்லியன் ஒளியாண்டுகள் சுற்றுதொலைவில் பூமியில் மட்டுமே உயிர்கோளம் இருப்பதால் பூமி, உயிர்க்கோளம்-1 (Biosphere 1, The Earth) என்று அழைக்கப்படுகிறது! காடுகளை அழித்தல், நீர், நிலம் மற்றும் காற்றை மாசுபடுத்துதல் மூலமாக சூழ்நிலைமண்டலம் மற்றும் இயற்கை சூழலின் மீது நாம் பாதிப்பை ஏற்படுத்தும் போது இதன் ஓட்டு மொத்த தொகுப்பான உயிர்கோளம் கொஞ்சம் கொஞ்சமாக அழிக்கப்பட்டு புவியில் உயிரினங்கள் வாழ்வதற்குரிய சூழல் முற்றிலும் அழிக்கப்படும்! புவியிலுள்ள உயிர்க்கோளத்தை எடுத்துக்கொண்டால் அது இயற்கையாகவே உருவானது! இயற்கையாக உருவான இந்த உயிர்கோளத்தை போலவே செயற்கையாக இப்புவியில் மனிதனால் உருவாக்கப்பட்ட இயற்கை மண்டலம் தான் இரண்டாவது உயிர்க்கோளம் (Biosphere-2) என்று அழைக்கப்படும் இரண்டாவது பூமி!

அமெரிக்காவின் அரிசோனா (Arizona) மாநிலத்திலுள்ள டஸ்கன் (Tucson) என்ற நகரிலிருந்து 64 கிலோமீட்டர் தொலைவில் உள்ள சாண்டா கேடலினா (Santa Catalina Mountain) என்ற மலையடிவாரத்தில் அமைந்திருக்கும் மிகச்சிறிய கிராமம் ஆரக்கிள் (Oracle)! இங்கு தான் மேற்சொன்ன ரெண்டாவது உயிர்க்கோளம் மனிதனால் செயற்கையாக கட்டப்பட்டுள்ளது! கடல் மட்டத்திலிருந்து 4000 அடி உயரத்தில் முழுக்க முழுக்க கண்ணாடி தடுப்பு சுவர்களுக்குள் கட்டப்பட்டுள்ள இந்த சின்னஞ்சிறிய உலகத்தில் புவியில் உயிரினங்கள் தோன்றியபோது இயற்கை மண்டலம் எவ்வளவு தூய்மையாக இருந்ததோ அதே அளவு தூய்மையுடன் செயற்கையாக கட்டப்பட்டுள்ளது! கண்ணாடி தடுப்பு சுவர்களுக்குள் இந்த உலகம் உருவாக்கப்பட்டுள்ளதால் வெளிக்காற்று உட்செல்லவோ உட்காற்று வெளிச்செல்லவோ இயலாது! வெயில் காலத்தில் உள்ளே உள்ள காற்று சூடாகாமல் இருப்பதை தடுக்கவும், உள்ளே உள்ள காற்றின் அளவை சரியான அளவில் வைத்துக்கொள்ளவும் லங்க்ஸ் (Lungs) மிகப்பெரிய அமைப்பு ஏற்படுத்தப்பட்டுள்ளது! இதன் கட்டுமானம் மிகவும் சிக்கலான மற்றும் உயரிய தொழில்நுட்பத்தை கொண்டது! தடுப்பு சுவர் அமைக்க பயன்டுத்தப்பட்ட கண்ணாடிகளும், அதனை தாங்கி நிற்கும் இரும்பு குழாய்களும் (Steel Tube) கூட மிகவும் பிரத்தியோகமாக தயாரிக்கப்பட்டவையே!

மொத்தம் 3.4 ஏக்கர் பரப்பளவு கொண்ட இந்த சின்னஞ்சிறிய உலகத்திற்குள் 1900 சதுர மீட்டர் பரப்பளவு கொண்ட மழைக்காடுகள் (Rain Forest), 850 சதுர மீட்டர் பரப்பளவு கொண்ட பவளப்பாறைகளை உள்ளடக்கிய சிறிய கடல் (Sea), 450 சதுர மீட்டர் பரப்பளவு கொண்ட கிளைகளிலிருந்து வேர்களை உண்டாக்கும் வெப்ப மண்டல மரங்களை உள்ளடக்கிய சதுப்புநில காடுகள் (Mangrove), 1300 சதுர மீட்டர் பரப்பளவு கொண்ட புல்வெளிகாடுகள் (Savannah), 1400 சதுர மீட்டர் பரப்பளவு கொண்ட பாலைவனம் (Desert), 2500 சதுர மீட்டர் பரப்பளவு கொண்ட விவசாய நிலங்கள் (Agricultural land), மனிதன் உட்பட அனைத்து விலங்குகளும் வசிக்க தேவையான வாழிடங்கள் ஆகிய அனைத்தும் உண்டு! அதோடு கடல்வாழ் உயிரினங்கள், பாலைவன உயிரினங்கள், புவிக்கு அடியில் வாழும் நுண்ணுயிரிகள், பறவைகள், ஆடு, மாடு, கோழி, பன்றி உள்ளிட்ட விலங்கினங்களும் உள்ளே உள்ள காடுகளில் அதிக கண்காணிப்புடன் அதே வேலை சுதந்திரமாகவும் வளர்க்கப்படுகின்றன!

சரி இதெல்லாம் எதற்கு என்கிறீர்களா? மிக மோசமாக சிதிலமடைந்து கொண்டிருக்கும் சுற்றுப்புற சூழலை சீர்படுத்தி புவியின் வாழ்நாளை நீடிக்க செய்வதுதான் இந்த ரெண்டாவது உயிர்கோளம் (Biosphere 2) கட்டபட்டதற்க்கான முக்கிய நோக்கம் ஆகும்! அதோடு பருவநிலை மாற்றம், புவி வெப்பமடைவதை தடுத்தல், உயிர் பண்மயம் (Bio-Diversity) புவியின் நீர் ஆதார சுழற்ச்சி (Terrestrial Water Cycle), நீர் மற்றும் நிலம் மாசுபடுவதை கட்டுப்படுத்துதல், சுற்றுப்புற சூழலின் மீது பாதிப்பு ஏற்படுத்தாமல் இயற்கையான முறையில் விவசாயத்தை பெருக்குவதற்கான வழிமுறைகள் ஆகியவற்றை பற்றியும் ஆய்வு மேற்கொள்ளப்பட்டு வருகிறது!

1991 ஆம் ஆண்டு முதல் செயல்பட துவங்கிய இந்த ஆய்வு மையத்தில் இதுவரையில் இரண்டு மிகப்பெரிய ஆய்வுகள் மேற்கொள்ளப்பட்டுள்ளன! மாசுபடுத்தப்படாத இயற்கை சூழலில் 1991 முதல் 1993 வரை இரண்டு வருடம் உள்ளேயே வாழ்ந்த இரண்டு மருத்துவர்கள் உள்ளடக்கிய எட்டு பேர் கொண்ட விஞ்ஞானிகள் குழு, நீர், நிலம், காற்று, காலநிலை மாற்றம், வளிமண்டல அறிவியல், சூழியல், புவி வெப்பமடைதல், உள்ளிட்ட முக்கிய ஆய்வுகளை மேற்கொண்டார்கள்! அதோடு நிலத்தில் வாழும் உயிரினங்கள், கடல் வாழ் உயிரினங்கள், நிலத்திற்குள் வாழும் உயிரினங்கள் குறித்தும் ஆய்வுகள் மேற்கொண்டார்கள்

இரண்டு வருடம் வெளியே வராமல் அடைக்கப்பட்ட கண்ணாடி சுவர்களுக்குள்ளே வாழ்ந்த இவர்களுக்கு தண்ணீர் மட்டுமே வெளியிலிருந்து அதுவும் குழாய்களின் மூலமாக வழங்கப்பட்டது! இந்த தண்ணீர் பல்வேறு கட்ட சோதனைகளுக்கு உட்படுத்தப்பட்ட மிகத் தூய்மையான நீர் என்பது குறிப்பிடத்தக்கது! இந்த தண்ணீரை பயன்படுத்தி அங்குள்ள காடுகளில் அவர்களுக்கு தேவையான உணவுப்பொருட்களை அவர்களேதான் விளைவித்துக்கொள்ள கொள்ள வேண்டும்.! வாழைப்பழம் பப்பாளிப்பழம், உருளைகிழங்கு, சர்க்கரைவள்ளி கிழங்கு,  வேர்கடலை, பீன்ஸ், அரிசி, கோதுமை உள்ளிட்ட ஏராளமான காய்கறிகள் மற்றும் உணவுதானியங்கள் அங்குள்ள காடுகளில் விளைவிக்கப்பட்டு அவற்றையே உணவுப்பொருட்களாக அவர்கள் பயன்படுத்தினார்கள்! எந்தவித ரசாயன சேர்மங்களும் கலக்காமல் கொஞ்சம் கூட மாசுபடுத்தபடாத இயற்கை சூழலில் விளைவிக்கப்பட்ட இந்த உணவுப்பொருட்களை உட்கொள்ள ஆரம்பித்தபோது இவர்களது உடல் எடை 40% அளவிற்கு குறைந்துபோனதாம், ஆச்சிரியமாக இல்லை? இரண்டு வருடம் தீவிர சோதனையில் ஈடுபட்ட இவர்களது முழு இயக்கமும் கண்காணிப்பு கேமராக்களின் உதவியுடன் முழுமையாக கண்காணிக்கப்பட்டது!

தொடர்ந்து இரண்டாவது கட்ட சோதனை 1994 ஆம் ஆண்டு மார்ச் மாதம் துவங்கப்பட்டு சில பிரச்சனைகளின் காரணமாக பாதியிலேயே கைவிடப்பட்டது! தொடங்கிய நாளிலிருந்து இன்று வரை நிர்வாக செலவு உள்ளிட்ட பல்வேறு பிரச்சனைகளை சந்தித்து வரும் இந்த ரெண்டாவது உயிர்கோள ஆய்வு திட்டம் இதுவரையில் மிகப்பெரிய கண்டுபிடிப்பு எதையும் நிகழ்ந்திவிடவில்லை என்றாலும், இதன் முக்கிய நோக்கமான சுற்றுப்புற சூழல் மாசுபடுவதை கட்டுப்படுத்தி புவியின் வாழ்நாளை அதிகப்படுத்துவது தொடர்பான மிகச்சிறிய உண்மைகள் கண்டுபிடிக்கப்பட்டாலும் கூட அதைக்காட்டிலும் மிகப்பிரம்மாண்டமான கண்டுபிடிப்பு எதையும் நம்மால் நம் எதிர்கால சந்ததிகளுக்கு வழங்கிவிட முடியாது என்பது மறுக்க முடியாத உண்மை!

சுற்று சூழல் தொடர்பான சில சுவாரஸ்யமான தகவல்களை உள்ளடக்கிய இப்பதிவின் இரண்டாம் பாகம் உங்களுக்காக காத்திருக்கிறது நண்பர்களே! தொடர்ந்து இணைப்பில் இருங்கள்! பதிவு தொடர்பான உங்களது கருத்துக்களை பதிவு செய்ய மறக்க வேண்டாம், உங்களது கருத்துக்கள் மூலமாகத்தான் என் தவறுகளை திருத்திக்கொள்ளவும் என்னை வளர்த்துக்கொள்ளவும் முடியும்! விரைவில் மீண்டும் ஒரு பயனுள்ள பதிவின் வாயிலாக உங்களை சந்திக்கிறேன்.! நன்றி.... வணக்கம்.!

	Tweet

பதிவுகளை தவறவிடாமல் வாசிக்க உங்கள் மின்னஞ்சல் முகவரியை கீழே உள்ளிட்டு பதிவு செய்து கொள்ளுங்கள்