உலகின் முதல் பல்கலைக்கழகம் தக்சசீலா அழிந்துபோன வரலாறு; destruction of takshashila the world first university

அனைவருக்கும் வணக்கம், உலகின் முதல் பல்கலைகழகமான தக்சசீலாவைப் பற்றிய எனது முந்தைய பதிவை அனைவரும் வாசித்திருப்பீர்கள் என்று நம்புகிறேன்! வாசிக்க தவறியவர்கள் நேரமிருப்பின் இங்கு சென்று வாசித்துவிட்டு இந்தப் பதிவை தொடர வேண்டுகிறேன்! தற்போது வரையிலும் எந்த நூற்றாண்டில், யாரால், எப்போது துவங்கப்பட்டது என்று உறுதியிட்டு கூற முடியாத உலகின் முதல் பல்கலைகழகமான தக்சசீலா தற்போதைய பாகிஸ்தான் பஞ்சாப் மாகாணத்தில் உள்ள டேக்ஸிலா என்ற நகரில் தோராயமாக கி.மு.ஏழாம் நூற்றாண்டிலிருந்து (700 BCE) இயங்கி வந்ததாக சென்ற பதிவில் பார்த்தோம் இல்லையா நண்பர்களே! இன்றைய பதிவில் தக்சசீலா பல்கலைக்கழகம் எப்படி அழிந்து போனது என்பது பற்றிப் பார்ப்போம் வாருங்கள்! 

வேதகாலத்திலிருந்தே தக்சசீலா நகரம் பல்வேறு கால கட்டங்களில் பல்வேறு அரசர்களால் கைபற்றப்பற்று அவர்களது ஆட்சியின் கீழ் இருந்து வந்திருக்கிறது! தக்சசீலா பல்கலைகழகத்தின் அழிவும், இப்பகுதி மக்களான காந்தர்வர்களின் அழிவும் ஒன்றுடன் ஒன்று தொடர்புடையதாக இருப்பதால், நாம் தக்சசீலா பல்கலைகழகத்தின் அழிவை பற்றி தெரிந்துகொள்ளும் போது காந்தர்வர்களின் அழிவை பற்றியும் காந்தாரக் கலையின் அழிவைப்பற்றியும் தெரிந்துகொள்ளுதல் இன்றியமையாததாகிறது! இதிகாச ஆதாரங்களின் படி காந்தர்வர்களை முதன் முதலாக தாக்கியவர் பரதன் (இராமனின் தம்பி) என்றே அறியப்படுகிறார்! போரில் வென்ற பரதன் தனக்கென அந்த இடத்தில் தக்சசீலா என்ற அரசாங்கத்தை (Kingdom of Takshasila) ஏற்படுத்தினார்! இதற்க்கு பிறகும் கூட காந்தர்வர்கள் அவ்வப்போது மீண்டு., அரியாசனத்தை கைப்பற்றி தங்கள் நாட்டை தாங்களே ஆட்சி செய்து வந்திருக்கிறார்கள்! இதனை இந்துக்களின் மற்றொரு இதிகாசமான மகாபாரதத்தின் வாயிலாக நாம் அறிந்துகொள்ளலாம்!

மகாபாரதத்தின் உச்சகட்டமாக கருதப்படும் குருச்சேத்திர போர் (Kurukshetra War) ஏற்பட முக்கிய காரணமாக இருந்தவர்களுள் ஒருவரான சகுனி (Shakuni) காந்தாரா நாட்டு இளவரசர் என்பது இந்த இடத்தில் நினைவு கூறத்தக்கது! இவர் காந்தார நாட்டு மன்னனான சுபலாவின் (King Subalaa) மைந்தன் என்பதோடு மட்டுமல்லாமல் குருவம்சத்தை சேர்ந்த அஸ்தினாபுர (Hastinapura; modern day Hastinapur, Utter Pradesh) அரசரான திருதிராஷ்டிரனின் (Dhritarashtra) மனைவி காந்தாரியின் (Gandhari) உடன் பிறந்த சகோதரன் என்பதும் குறிப்பிடத்தக்கது! காந்தாரிக்கும் திருதிராஷ்டிரனுக்கும் பிறந்த நூறு மகன்களே கெளரவர்கள் (Kauravas) என்று அழைக்கப்பட்டார்கள் என்பது உங்களுக்கு தெரிந்திருக்கும் என்று நம்புகிறேன்!

கிட்டத்தட்ட ஒரு மில்லேனியம் ஆண்டுகளுக்கு (1000 BCE) முன்பு தொடங்கிய இந்த கந்தர்வ இந்துக்களின் பாரம்பரியம் பாகிஸ்தானின் தற்போதைய டேக்ஸிலாவில் கிட்டத்தட்ட கி.பி. பதினோராம் நூற்றாண்டு (1100 AD) வரை நீடித்து பிழைத்திருந்திருக்கிறது என்றால் உங்களால் நம்ப முடிகிறதா நண்பர்களே! உண்மைதான், கஜனவித் பேரரசரான (Ghaznavid Empire (Modern day: Ghazni province, Afghanistan), 936 AD – 1187) முகம்மது கஜினி (Mahmud of Ghazni, 971 AD – 1030 AD) இப்பகுதிகளின் மீது படையெடுத்து தாக்கும் வரையில் இப்பகுதியில் காந்தர்வம் என்பது முற்றிலும் அழிந்துபோய்விடவில்லை, இவரது தாக்குதலுக்கு பின்புதான் இப்பகுதியில் காந்தர்வமும், காந்தாராக் கலையும் முற்றிலும் அழிந்துபோய் இப்பகுதியில் இஸ்லாம் அதிக அளவில் பரவ ஆரம்பித்தது என்று வரலாற்று ஆய்வாளர்கள் தெரிவிக்கிறார்கள்!

காந்தர்வ இனமும் காந்தாரா கலையும் முற்றிலும் அழிந்துபோனது கஜினியால் தான் என்றாலும் காந்தர்வர்களின் அழிவின் துவக்கம் கஜினியால் ஏற்பட்டது அல்ல!  நான் முன்பே சொன்னது போல் வரலாற்றில் தக்சசீலா பல்வேறு காலகட்டங்களில் பல்வேறு அரசர்களின் பிடியில் இருந்திருக்கிறது! இந்தியர்களை தவிர்த்து இப்பகுதியை அந்நியர் ஒருவர் முதன்முதலாக கைப்பற்றினார் என்றால் அவர் டாரியஸ் தி கிரேட் (Darius the Great, 550 BCE – 486 BCE) என்று தான் சொல்ல வேண்டும்! எக்பாட்டனாவை (Ecbatana; Modern day Hamadan, Iran) தலைநகராக கொண்டு சைரஸ் தி கிரேட் (Cyrus the Great, 559 BCE – 529 BCE) என்பவரால் தோற்றுவிக்கப்பட்ட பெர்சியவின் முதல் பேரரசான அகய்மேனித் பேரரசின் (Achaemenid Empire, 550 BCE – 336 BCE) மூன்றாவது அரசர் டாரியஸ் தி கிரேட் என்பது குறிப்பிடத்தக்கது! கி.மு.518 (518 BCE) ஆண்டு தக்சசீலா பகுதி இவரது ஆதிக்கத்தின் கீழ் வந்தது! இப்பகுதியில் இவர் ஏற்படுத்திய சேதம் அளவிடற்கரியது என்கிறது வரலாறு!

மசிடோனிய  பேரரசரான (King of Macedonia, Greece) அலெக்ஸாண்டர் (Alexander the Great, 356 BCE – 323 BCE) பெர்சியாவை கைபற்ற முயன்றபோது ஏற்பட்ட போரில் கி.மு.334 ஆம் அண்டு அகய்மேனித் பேரரசு தோல்வியுற்று அலெக்ஸாண்டரிடம் சரணடைந்தது! இருந்தாலும் கூட அப்போது அகய்மேனித் பேரரசின் கட்டுப்பாட்டில் இருந்த தக்சசீலா அலெக்ஸாண்டரின் நேரடி கட்டுப்பாட்டின் கீழ் வந்துவிடவில்லை! அந்த காலகட்டத்தில் தக்சசீலாவின் அரசனாக தன்னை பிரகடனப்படுத்திக் கொண்ட அம்பிக் (Ambhik, known as Ambhi) என்பவருடன் கி.மு.326 ஆம் ஆண்டு ஏற்பட்ட போரின் வெற்றிக்கு பின்பே அலெக்ஸாண்டரால் தக்சசீலாவை கைபற்ற முடிந்தது! தனது வெற்றியை குறிப்பிடும் வகையில் தக்சசீலாவிற்கு அலெக்ஸாண்டர் வைத்த பெயரே தக்சசீலாவின் இன்றைய பெயரான டேக்ஸிலா என்பது குறிப்பிடத்தக்கது!

பெர்சியர்களாலும், கிரேக்கர்களாலும் போரிட்டு சிதைக்கபட்ட தக்சசீலா மெல்ல மெல்ல தன் பாரம்பரியத்தை இழக்க ஆரம்பித்தது! மேலும் பெர்சியர்கள் மற்றும் கிரேக்கர்கள் தங்கள் நாட்டு பழக்க வழக்கங்களை இப்பகுதி மக்களிடையே கட்டாயமாக புகுத்தியதால் எஞ்சியிருந்த காந்தர்வர்கள் தங்களது சொந்த அடையாளங்களை கொஞ்சம் கொஞ்சமாக இழக்க ஆரம்பித்தனர்! இந்த காலகட்டத்தில் தான் சந்திர குப்த மெளரியர் (Chandragupta Maurya, 340 BCE – 298 BCE) சாணக்கியரின் உதவியுடன் பாடலிபுத்ராவை (Pataliputra; Modern day Patna) தலைநகராக கொண்டு மெளரிய பேரரசை (Maurya Empire, 322 BCE – 185 BCE) ஏற்படுத்தினார்! தொடர்ந்து கொஞ்சம் கொஞ்சமாக தனது ஆளுகை எல்லையை விரிவுபடுத்தவும் ஆரம்பித்தார்!

மெளரியப்பேரரசின் மூன்றாவது அரசரும் சந்திர குப்த மெளரியரின் பேரனுமான அசோகரது (Ashoka the Great, 304 BCE – 232 BCE) ஆட்சிக்காலத்தில் பாகிஸ்தான், ஆப்கானிஸ்தான், ஈரான், பூடான், நேபாளம் மற்றும் தெற்கில் இலங்கை வரை மெளரியர்களின் ஆட்சி எல்லை விரிந்திருந்தது! இந்தியாவின் பொற்காலமாக கருதப்படும் மெளரியர்களின் ஆட்சிக்காலத்தில் தான் இந்தியா முதன் முதலாக ஒருங்கினைந்து ஒரே ஆட்சியின் கீழ் இருந்தது என்பது குறிப்பிடத்தக்கது! (சேர, சோழ, பாண்டிய அரசை தவிர்த்து; அந்நாளில் இவை மெளரியர்களின் நட்பு தேசமாக இருந்தது). இரண்டு தலைமுறைகளாக மெளரியர்களால் வெல்ல முடியாத நாடாக இருந்த கலிங்கத்தை (Kalinga; Modern day Orissa) கைபற்ற ஏற்பட்ட கலிங்க போருக்கு (Kalinga War) பிறகுதான் அசோகர் புத்த மதத்தை தழுவினார் என்பது குறிப்பிடதக்கது!

அசோகரது ஆட்சிக்காலத்தில் அசோகரது உந்துதலின் பேரில் தக்சசீலா பல்கலைகழகம் புத்தமத கருத்துகளை பரப்பும் முக்கிய ஸ்தளமாக உருமாற்றம் பெற்றது! அதோடு அசோகர் புத்தமத கருத்துக்களை பரப்பும் வகையில் பல்வேறு மடாலயங்களை ஆப்கானிஸ்தானின் கிழக்கு பகுதிகளில் ஏற்படுத்தினார்! பின்னர் புத்த மதம் இப்பகுதியில் படிப்படியாக வளர ஆரம்பித்து கி.பி. ஐந்தாம் நூற்றாண்டுகளில் மாமியன் பள்ளத்தாக்குகளில் உள்ள மலைகளை குடைந்து இரண்டு மிகப்பெரிய புத்தர் சிலைகளை நிறுவும் அளவிற்கு வளர்ந்தது! பாமியன் புத்தர் சிலைகள் (Buddha’s of Bamiyan, built in 500 AD) என்று அழைக்கப்பட்ட இந்த இரட்டை புத்தர் சிலைகள் தான் காந்தாராக் கலையின் பெருமைகளை 2001 ஆம் ஆண்டுவரை உலகிற்கு பறைசாற்றிகொண்டிருந்தது என்பது குறிப்பிடத்தக்கது! பின்னர் இது 2001 ஆம் ஆண்டு மார்ச் மாதம் தாலிபான்களால் வெடி வைத்து தகர்க்கப்பட்டு அழிக்கப்பட்டது!

அசோகருக்கு பிறகு மெளரியப்பேரரசில் வலிமை பொருந்திய அரசர் யாரும் உருவாகாததால் மெளரியப்பேரரசு வீழ்ச்சியடைய ஆரம்பித்தது! தொடர்ந்து பல்வேறு அரசாங்கங்கள் தக்சசீலாவை தாக்கி கைபற்ற முனைந்தன! இறுதியாக மத்திய ஆசியாவை (Central Asia) சேர்ந்த ஹெப்தாலிட் (Hephthalite) என்ற நாடோடி இன மக்களால் கி.பி.460 (460 AD) ஆம் ஆண்டு தாக்கப்பட்டு கைப்பற்றப்பட்டது! இவர்களது தாக்குதலில் தான் தக்சசீலா பல்கலைக்கழகம் மோசமாக சிதைவுற்று மீண்டும் உருப்பெற முடியாத அளவிற்கு முற்றிலும் அழிக்கப்பட்டது! ஹெப்தாலிட் இன மக்களை பற்றி வரலாற்றில் பல்வேறு குழப்பமான தகவல்கள் நிலவுகின்றன! இவர்கள் எந்த நாட்டை சேர்ந்தவர்களாக இருக்கக்கூடும் என்பதில் தற்போது வரை உறுதிப்படுத்தப்பட்ட தெளிவான தகவல் இல்லை என்று தான் கூற வேண்டும்!

தக்சசீலா பல்கலைகழகத்தின் அழிவு ஒரு சில ஆண்டுகளில் நிகழ்ந்தது அல்ல! பல்வேறு அரசர்களின் பிடியில் கொஞ்சம் கொஞ்சமாக சிதைவுற்றே இறுதியாக கி.பி.ஐந்தாம் நூற்றாண்டு வாக்கில் முற்றிலும் அழிக்கப்பட்டது! தக்சசீலாவின் அழிவை பற்றி அறிந்துகொள்ள தக்சசீலா கண்டத்தை யார் யார் கட்டுப்பாட்டில் வைத்திருந்தார்கள் என்பது பற்றி தெரிந்துகொள்ளுதல் அவசியமானது! இதன் காரணமாக பல்வேறு அரசர்களின் காலத்தை நோக்கி பயணித்தது தவிர்க்க இயலாமல் போனது! தக்சசீலா பல்கலைக்கழகம் ஐந்தாம் நூற்றாண்டில் அழிக்கப்பட்டுவிட்டாலும் கூட, இப்பகுதியில் பிறந்த காந்தாரக்கலையும் காந்தர்வமும் கிட்டத்தட்ட பதினோராம் நூற்றாண்டு வரை தப்பி பிழைத்தேயிருந்தது! முகம்மது கஜினி இப்பகுதிகளின் (1100 AD) மீது தாக்குதல் நடத்திய பிறகுதான் காந்தாரக்கலையும் காந்தர்வமும் முற்றிலும் அழிய ஆரம்பித்து  இப்போது எழுத்துக்களில் மட்டுமே எஞ்சியிருக்கிறது! வருங்காலத்தில் இனி எழுத்துக்களிலும் இல்லாமல் போகலாம்!

பதிவை பற்றிய உங்களது கருத்துக்களை தவறாமல் பகிர்ந்துகொள்ளுங்கள் நண்பர்களே! உங்களது கருத்துக்கள் எனது தவறுகளை திருத்திக்கொள்ளவும் என்னை வளர்த்துக்கொள்ளவும் உதவும்! விரைவில் மற்றுமொறு பயனுள்ள பதிவின் வாயிலாக உங்களை சந்திக்கிறேன்... நன்றி.. வணக்கம்!!!

	Tweet

பதிவுகளை தவறவிடாமல் வாசிக்க உங்கள் மின்னஞ்சல் முகவரியை கீழே உள்ளிட்டு பதிவு செய்து கொள்ளுங்கள்